IL FESTINO

DEL BARBA BIGO

DALLA VALLE


Dove s’intende una festa di contadini, nella quale si

trovano a ballare molte putte e garzoni.


Con il modo di dare i balli all’usanza contadinesca


Ed in ultimo la gran questione successa fra dui villani su la det-

ta festa, per la quale ogni cosa và in conquasso.

Persone che si trovano alla detta festa


Barba Bigo

} Vecchi di casa

Barba Pasquale

Barba Gasparro


Mingone

} Suoi figlioli

Gabriello

Pirone


Pier dal Molino

} Sonatori

Masotto

Mignano

Zanello


Sabadina


} Putte che ballano

Sandrina

Santina

Filippa

Tuonia

Rossa

Pluonia

Iachimina


Zia Zentil

} Donne vecchie

Zia Sabetta


Andriol


} Balladori

Marcon

Piron

Tugnaz

Bastian

Salvador


Burtlin

} Danno i balli

Gabriel


Massaro del Comun

Burtlin parla

Hosù, tus, ch’vlenia far?

N’vlenia un po’ balar

Ades ch’è da Carnval,

Ch’in dsiv, barba Pasqual?

N’v’ par al dver a vù,

Ch’a saltama un poch in su,

In sta sira? Dsì d’sì.


Barba Pasqual

N’parlar miga con mi,

Ch’an m’impaz in tal intrig,

Và pur, parla là con Big,

Ch’la cosa i tocca a lù.


Burtlin

Barba Big, ch’fenia, hosù,

N’z’ vlenia dimenar

In sta sira, e travaiar

Tutta not infin a dì,

Senia mort po far al mond,

Guarda qui ch’salt tond

A i ho fat, ch’v’ in par?


Barba Bigo

Eh, Burtlin, al n’s’po far

Più ngotta, car cumpagn,

Ch’al ni è ngun guadagn,

Masmament al temp d’ades,

An vrev ch’al s’fes

Qualch’ chias in t’al più bel,

E ch’al vgnes al Barsel

E mnarz tut a Blogna,

Prché ades al n’bisogna

Vler più far al bel humor,

T’sa ben ch’ Salvador

S’dletta a guastar

Tut ‘l fest.


Mingon

Hosù, mi par

Daz pur litentia a nù,

E n’apad po’ pora vù,

Ch’an farem minga dal chias,

Prché ades ugnon sta bas,

Chi han pora dla rason

Es bisogna star in ton;

E po’ mi con Gabriel

A staren tut dù al rastel,

E vder, ch’vol intrar,

Es n’lasserem passar

S’n’quij ch’z’par a nù.


Barba Bigo

Hosù, via, fadal pur, sù,

Ch’am cuntent, i mia fiuua,

Mo av arcord, ch’al dì d’anchua

Le mal far di trebeguoz:

Al m’dsea Barba Pigoz

Ch’la robba di minchion

E’ la prima ch’và a vaiun,

T’sa po ti quel ch’a voi dir.


Burtlin

A’ so quel ch’a vli uffrir,

Mo anca mi so cun la và,

Che a chi s’tira al bal in cha,

Al ie và d’la spesa ancora.


Mingon

Hos' tasì mo’ un po’ in bon hora,

E lassaz a nu la cura,

Ch’an haven miga paura

D’n’arniesr cun hunor,

Es faren senza rmor

Al festin, n’v’dubita’,

Ch’a sren ben respettà

Lassaz pur a nu l’impaz.


Barba Bigo

Hosù, chiama qui Stramaz,

Ch’vaga un poc pr al chmun

A invidar sti ragazzun

E po’ tut l' mamlel,

Và, ti sieg Gabriel,

A invidari pr sta sira,

Prché a veg c’havì la mira

S’scussar un po’ i bragun,

Mo’ chi lasn a cha i spuntun

Sovra al tet, ch’av al dig,

Ch’a n’ho bisogn d’ngun intrig.


Gabriel

N’v’stad a dar impaz,

Hosù, andema via, Stramaz,

Mo’ ch’put s’ha d'aivida’?


Barba Bigo

Chiama quella d’mia compar,

E la fiola dal Cullina,

E qul’dò dla Zea Nanina,

E la Tuonia dal Cason,

E la Menga dal Canton,

La Pluonia dla Rizza,

E la Iachma dal Pelizza,

La Flippa dal Magagna,

E la Gnuda so compagna,

E sal vol venir la Rossa,

E la Ghida da la Fossa,

Ch’l viegnan anca lor,

E po’ chiama tut qulor

Ch’a t’ho dit, hosù va' via,

Fin cha son d’fantasia,

Mo pr via d’sunadur,

Ch’an restassin po al bur.


Gabriel

A turen Pier dal Mulin,

Ch’sona ben d’rebeghin,

E Magnan d’ Barba Ton,

Ancha lu con al viulon,

E Masot, so fradel,

Con la Zithara, e Zanel

Da la piva, o vettij là,

Sunadur dund s’va.


Sunadur

Cosa vrissij, car fradia?


Gabriel

A vren mnar i pia,

In sta sira, idest ballar,

E s’az vli vgnir a sunar,

Av darem sodisfation.


Sunadur

Mo’ a sen qui tut con i son,

Pruopia pront e apparchià,

E pur ch’a sian da vu pagà,

A vgnaron dunda vlì,

Es staren su fin a dì,

Anch tutta una stemana.


Gabriel

Mo’ mi viegna la scalmana,

Ch’mi crez ch’an psevin dar

In ti miur, oh vdì mi par,

Ch’v’aspetta in sal purton,

Andà là, cha stema in ton,

Potta d’damn, e asptaz a cà.


Barba Bigo

Sunadur, vgnì pur in zà,

Mo’ putana, ch’an dig

A sulen pur esser amig

Oh s’a fus ch’m’aiera zà,

A vrè fat tremà sta chà,

L’ara, al portegh, e al pullar,

Ch’am arcord un dì d’Furbar,

Ch’a ballia cinquanta bal,

In tal prà d’Barba Anbal,

Con la Rossa da Padern,

Ch’l’iera qusi da mez invern,

Es sudavan chm’purzia,

Ch’av do la fed mia,

Ch’a la fia tant dmnar,

Ch’la n’pusia più arfiadàr,

Tant la iera inscalmanà,

Anch un dì, pur in qual prà,

A strachia la Nichlosa,

E la Flippa da Rigosa,

Ch’ieran po’ gaierd put,

Ch’l’ sulevan straccar tut,

I zuvnot d’sta villa,

Mo und lassia la Camilla,

E la Iachma da Bazan,

Ch’al ni fu ma chrstian,

Ch’l’pes far straccar

S’n’mi, ch’la fia sudar,

Ch’l guzzavan chm’ un grundal.

Es fu al dì d’Carnval,

In s’la festa di Rundun,

Ch’al ni n’è mo più nissun

Chi ien andà d’mubiglia in straz,

Anca lor in sti inguanaz,

Ch’al ni n’è più nsun al mond,

L’è pur viv Barba Rimond,

Mo l’è mal atapunà,

E anca mi m’sun dumà,

D’maniera, car fradia,

Ch’an pos far più saltaria,

Né ballar, chmod a iera us,

Prché a i ho mo’ pien al fus,

Es son, cun dis Galvan,

Pr andar d’inchua a dmàn,

A la volta del Papoz,

Ch’a la guerra di Pier Stroz

A dsea haver da quindis egn,

E tut quent i mia cumpegn

En andà a lavar i miua,

Inienz d’mi, hosù fiua,

Intrà dentr, ch’l’è bass’hora,

Es chmenza a esser hora

Ch’l’ariva quelle put,

Intrà ben in casa tut,

E accurdà qui burdigun,

E s’al iè d’vu nisun

Ch’apa sed, s’in fazza dar,

Ch’tuta not s’ha da ballar,

E fuors anch dman d’not,

Pier entra dentr, su Masot,

Cosa aspettet, babion,

E tien bas quel viulon,

T’n’dag in qual tinaz,

A ch’dighia balurdaz,

T’ha mo’ trat zo qula vanga.


Masot

Al mal’è, ch’qula stanga

M’è da' squas in s’la testa.


Barba Bigo

La sre’ sta’ una bella festa,

S’la haves rot al zuccon.

Hosù, andà là in qual canton,

Prché a sent vgnir brigà,

Es m’parin qui in t’al prà.

Oh, Zintil, apia la lum,

Ch’vuol dir d’tant fum?


Zintil

E ien stà sti giuttaria,

Chjan trat su di canaria,

Es han tolt d’qui bagnà,

Chi z’han squas tut afugà.


Barba Bigo

Hosù, portai via d’lì,

Su, Zanin, a ch’diga mi,

Vai tra là de dria da cha,

E adusì di fes in zà,

Ch’al s’faga un buon fuog.

Sunadur, stè al vostr’ luog,

Arappav’in s’qual bancon,

Tut quant, oh bon, oh bon,

Ch’in dsiv, n’stav galant?


Sunadur

Al se scossa tut quant,

Al ie de’ mancar un pe’.


Barba Bigo

Al ni manca zà, ch’al iè,

Le ch’l’è curt un puchtin,

Quest’ ch’è qui, dund’è Pirin?

Met qui sotta un po’ una schiappa.


Pirin

Ma und vlì mi ch’al appa?


Barba Bigo

Và lì fuora, t’n’harà!


Pirin

Hosù, a punt a n’ho accattà,

Una qui, in st’canton.


Barba Bigo

Metla sotta a qual bancon.

Da qual là, ch’è curt qual pe’,

Osù, tirat mo in qule

E va' là, sotta la fuga.

Oh l’arriva la gran ruga

D’brigada, es iè Pghin,

Ch’ancha lu vien al festin,

Es è vecch, ch’al n’po’ più,

Am arcord ben ch’ancha lu

Iera un ch’tgneva dur,

Mo’ al n’po’ più pissar al mur.

Oh, vgnì inienz, al mia vecchiet.


Barba Pighin

Bona sira a sta brigà,

A i ho intes ch’a ballà,

Es m’son vgnu a dmnar

Con st’put, ch’t’in par

Big, n’sonia mo’ a la via?


Barba Bigo

Barba Pghin, in fed mia,

Ch’a si anch in bona aità,

Es vuoi anch ch’a ballà

In sta sira un saltarel.


Barba Pighin

Eh, Big, fradelin mia bel,

L’è da zo la fantasia,

A i ho fat la part mia

Ancha mi, quand al su temp,

Ades mo a son in tal temp

Ch’an pos più trepezar,

Pur al m’pias d’veder ballar

E d’star in recreation.


Barba Bigo

Osù, andà lì in qual canton,

Fai lì luog, Iachimin,

Ch’al n’daga in qual cadin,

Andà ben per qui de zà,

E assettan qusì là,

Ch’an dar’ impaz a nissun,

Oh, vignì inienz, ragazzun.


Gabriel

Bona sira, a sen qui tut,

Fad luog un po’ a st’ put,

Tira inienz qula banca,

Ie nissuna ch’al ie manca

Lì da sedr? Tua Zoana,

Ponet lì in su qula scrana:

Zea Sabetta, vgnì quì,

Rossa, sied mo zo ancha ti.

Oh, dai dentr, sunadur,

Fav inienz, balladur,

Ch’va a piar? Và ti, Piron,

No, sta indria, ch’al va Marcon.


Marcon

A vuoi piar qui l’Anzelina,

Prché l’è la mia vesina,

Su, sunam un bergamasch,

E tgnì dur pr fin ch’a casch,

Tgnì sald infin a dì,

Sunadur, potta d’mi.


Gabriel

N’tgnì si lung al son,

Prché al vol ballar ugnon;

Fat inienz ti, Andriol,

E dria ti andarà Pol,

Ch’sonada vuot ch’al sona?


Andriol

Ch’al me faga la Menchina,

Vientin via, ti, Iachmina.


Iachmina

Và pur, pia la Sabadina.


Sabadina

Ch’al te pia pur ti surella,

Prch’mi a so ch’al m’usella.


Andriol

Osù, vgnì una d’vu,

E n’m’fad star qui più.


Gabriel

Quala vot, dil pur ti.


Andriol

Mo’ a i ho dit a qulia ch’è lì.


Gabriel

Iachmina, va' a ballar,

E n’t’far più struffiunar.


Iachmina

Osù, a vegn.


Andriol

Osù, sunà,

Cha vuoi far un salt sbragà,

Du, tri, quatr, cinqu e sia,

Mo’, dgretia, fav indria,

Ch’am possa dmnar,

Ch’in dsiv, ch’v’in par

D’sti salt, Barba Gaspar?


Barba Gaspar

Mi fradel, vindrev al car,

L’cavr, i bich, l’vach e i bua,

E pser far al dì d’anchua

Quel t’fa ti, car fradel.


Andriol

Oh, i m’lassa in t’al più bel.

Osù pur chm’a turnarò

St’altra botta, am arfarò.


Sunadur

Mo fradia, ch’da i quattrin?


Gabriel

Sunà pur, da paladin,

E n’v’stad a dar affan,

Ch’an sen qui per far ingan.


Andriol

Tgnì sald st’ducaton,

Potta d’damn, oh via Piron,

Ch’sunada hat in piaser?


Piron

Fam dgratia un po un “Ruzier”.

Vien inienz ti, Flippa,

Ch’a scussem un po’ la trippa.

Oh via ben, ah mond bon,

Tgnì ben sald con qual viulon,

A ‘n sent qual rebeghin,

Mo’ t’n’harà di mia quattrin,

Stad in dria brigada cara.


Gabriel

Oh t’ vris tutta l’ara,

Al curtil, e tut al prà,

Es n’srev po nianch assà,

Tant t’aslarget in tal ballar.


Piron

Gabriel n’m’atintar,

Perché a son in calda ades.

Ah, Flippa, viem appres,

Fermat mo’ lì, dond t’ia

E sta salda lì in si pia,

Fin ch’t vì ch’am ferm mi,

Chm’ a son ferm balla po’ ti,

Prché al và qusì st’bal.


Flippa

Mo t’pist cun fà un caval,

Es m’urt cun fà un munton,

N’m’dar d’qui spunson.


Piron

Mo l’è al bal ch’và qusì,

Oh, chmenza mo’ anca ti,

Sù, via, ben n’t’smarir.


Gabriel

Oh, Piron, sat ch’at vuoi dir,

N’zanzar tant in tal bal.


Piron

Osù, tas ti cantagal,

T’n’sa quel ch’t’dig,

S’ancha ti fus in st’intrig

An so quel ch’t’fies.


Burtlin

Osù, l’ha rason ades,

Tocca pur su aliegrament,

E n’t’rompr altrament.


Piron

Oimè dia chi han finì,

Aquetav, sa vlì,

Ch’al n’s’po’ sintir ngotta.


Gabriel

Oh, Tugnaz, fat mo sotta

Che sta volta tocca a ti.


Tugnaz

Suna pur, potta d’mi,

Viè via, Rossa, dam la man.


Rossa

Mi n’bal ch’st’donn’al san,

Ch’l’è poch ch’l’è mort mi mar.


Tugnaz

Ch’hoia donca da piar.

Hosù a pij qui la Pluonia.


Pluonia

Ch’al ie viegna pur la Tuonia.


Tuonia

Prché vuot ch’a i vaga mi,

S’la dir prima a ti.


Pluonia

Osù, mi ni vuoi andar,

Ch’al m’dsea prima invidar,

E no torm’ per dsefij.

Sta pur lì, ti harà le fij

Aspettar ch’a viegna mi.


Tugnaz

T’n’vua vgnir né lia né ti.


Pluonia

Mi t’l’ho dit, car fradel.


Tugnaz

Mo av n’instò, l’mi surel

Sa vgnì, anch sa n’vgnì,

Guardà più ch’am vederì

Vgnirv a piar nguna d’vu.


Gabriel

Oh, Tugnaz, n’in dir mo’ più

St’ha ben un poc d’fava,

al n’bsogna ch’la t’agrava,

Prché in ver t’ha poca gretia.


Tugnaz

Osù, l’è la mia disgretia,

An vuoi star a disputar,

Mo’ a m’farò ben vindicar,

S’al m’vien la balla in man.


Barba Bigo

Và mo’, balla Bastian,

Ch’sta volta tocca a ti.


Bastian

Mo acurdà, potta d’ mi,

Un puchtin qui instrumient,

E tgnì sald, po’ far, i dient,

In per fin a dmatina,

A t’pij, t’, ve’, Santina.


Santina

E mi viegn, Bastian fradel.


Bastian

Fam un poch al saltarel,

Dla lodla capluda.


Barba Bigo

Andà dria per fin ch’al suda,

Oh, po’ far l’mi vach,

T’chmenz a esser strach,

Mo va’ pur, ti è un gran pultron.


Bastian

Al s’m’è sligà un schfon,

E per quest’al par ch’a sia

Strach, mo vù, tuccà pur via,

Sunadur, e lassai dir,

Ch’an son ma’ per finir,

S’a sties ben in bal un an.


Barba Bigo

Tra’ da bevr, vè Zuan,

E van porta a i sunadur,

E ch’al sippa d’qual madur,

Prché i possin ben sunar.


Sunadur

Al mal’è ch’a vrien biassar.


Barba Bigo

Mo’ alla fe’ ch’havì rason!

Cosa fat, und’iet, Mingon?

Met al fuog la padella,

Zanin, tua la salznella,

E va’, taia una mzina,

Vai, aida, Sabadina,

E ch’al s’faga dla brasuola.


Sunadur

Eh, no, no, ch’al temp vola,

A burlen n’v’afadigà

Ch’l’è poch ch’havè mrindà

Con Sandron dalla Cassina.


Bastian

Sunam donca la “viulina”,

E no, no, fam la “muretta”.


Gabriel

Mo’, Bastian, v’iè ch’aspetta

E di eltr qui ch’volin ballar.


Bastian

Mo’ al busogna ben aspttar

Ch’appa fat mi st’ballet.

Sunadur, agnì più stret,

Ch’a n’intend st’tenor.

Oh, qusì, viva l’amor,

Tgnì dur fin cha v’al dig,

Tgnì st’capel vù, barba Big,

Ch’al m’fuma un po’ al zuccon,

E tasì, ch’a senta al son,

Spessegà ben, sunadur,

A ch’dighia tgnì ben dur,

Dinar paga, andà pur dria,

Ch’a i ho in calda ades i pia:

Ah, Santina, aliegrament

Qula zithara n’s’sent.


Sunadur

L’è ch’al cant s’è spezzà.


Bastian

Oh, a i ho squas biastmà,

Potta d’l’aiar, guarda tì,

Fai un grop, potta d’mi.


Salvador

Sì, crti ti, ch’la sia una stroppa,

Ch’in t’un trat la s’agroppa.


Bastian

Ela ma più ch’una corda.


Salvador

Osù, tas, bestia balorda,

E va dria al fat to.


Bastian

Oh, Salvador, mi n’so

St’sa ti, ch’a son mardà.


Salvador

Ben sa ch’al so.


Bastian

Mo’ t’m’ha dà

D’la bestia pr la testa.


Gabriel

Osù, a vlì guastar la festa,

Ch’am n’aveg, putana d’mi,

Andà un puoch fuora d’qui.


Bastian

Mo ch’al parla con mudiestia,

Prché m’disal d’la bestia?


Gabriel

Mo al n’l’ha dit a bella man.


Barba Bigo

Osù, riequia mo, Bastian,

Ch’an daga mi in ti rut.

N’v’muvì da seder, oh put,

Prché quest n’è nient.


Bastian

MI t'dig t' t’in ment

Pr la gola, Salvador,

A parlar d’qual tenor,

Es son pront e apparecchià

Pr mustrart t’ha mal parlà,

E ch’a son un hom da ben.


Barba Bigo

Osù, tas, prché al saven;

N’muntar in tanta furia,

Ch’al n’l’ha fat per fart inzuria,

Ch’la parola ie scappà.


Bastian

E mi dig chal m’ha incargà

Ch’an son miga minchion.


Barba Bigo

Osù, met zo qual zanghion,

Prché a vuoi cha fad la pas,

Salvador, ai vuoi t'al bas.


Salvador

Ch’mi al basa, mo s’al so,

A son un brich, mi, s’al fo.


Bastian

No, no, vien pur fuora d’qui.


Salvador

Va pur là, potta d’mi,

Ch’t’m’invid propria al mi zuog.


Barba Bigo

N’ve movì dal vostr luog,

Oh fiol, e stad lì,

E lassam far a mi:

Salvador, und’vuot andar?


Salvador

Atindì vu a far sunar,

E n’m’stad a tratgnir,

Prché a vuoi un po’ chiarir

St’bravaz, ch’m’ha sfidà.


Barba Bigo

Lassa star lì qual furcà!

Und vat ti, con qual pal?

Oh, fiuua, n’fad dal mal,

Ch’andarì tut in preson.

Volta in là qual schiop, Simon,

A ch’dighia, bestiazza,

T’n’acuoij a qula ragazza.

Oh, va' mo fa' di festin,

Pr dar spas a i tua vesin,

Mo s’ngun ma più m’achiapa,

M’possa vgnir al mal dla zapa:

N’dissia mi, ch’Salvador

Srev al prima a far rmor?

Es ho dit la vrità,

Ch’a m’l’iera induinà.

Und’andav, vù, zea Sabetta?


Zea Sabetta

A n’al so, mi puvretta,

Und’è andà l’mi put.


Putte

Oh, mi mar, a sen qui tut.

Su, dgretia, andema a cha.


Zea Sabetta

Oh, fiol, avian là,

Oimè dia, cha trem tutta,

Ma s’ai son ma più condut,

Che mi viegna la muria.

Senti pur la in s’la via,

Si s’dan d’bon budel.


Tuonia

Mi ho pers un pansel.


Iachmina

E mi un guant, e no a l’ho qui.


Zea Sabetta

Oh, Anzlina, salta lì,

Qual fussà, ch’a voi ch’andan

Pr dezà, chiama qual can,

Chi ni diesn un’archbusà,

Anden zò per st’fussà,

Ch’va a cha d’barba Pier,

Tgniv qui dria ch’al iè al sintier,

Caminà, l’mi ragaz.


Pluonia

Al s’m’sliga un ligaz,

Asptam al mi’ surel,

Ch’a i ho un schfon a campanel.


Flippa

Osù, via, tiratal su,

Ch’al n’è temp d’star qui più,

Ch’al n’z’arves al rmor de dria,

Ch’a sent zent qulà in s’la via,

Ch’par ch’corran in zà a dramon:

Mo che quest, al par Piron,

E ‘l des, l’è ben lu.

Mo und corral da pr lù,

Pr sti chemp, al di esr frì!


Piron

Zea Sabetta, mo a fuzì,

Cosa haviv po’ far al tron,

Andà pian.


Zea Sabetta

Oimè, Piron,

Fradlin, a tremen tut,

Guarda pur lì qul put:

Ch’s’en pissà tut quant ados

D’la pora, e mi n’pos

Star in pia. Fradlin mia car,

Ze vuot un poc accumpagnar

Fin ch’a sen in luog secur?

Vet pur qui ch’andem al bur,

Tut quant a lambrugon.


Piron

E turnà, potta d’un ton,

Tut mieg in s’al festin,

E chm’an son mi lì vsin,

N’hapa pora d’ngun,

Chi z’aspetan con i son,

Sù, vgnì via, l’mi tusot.


Zea Sabetta

Anden pur, ch’lè meza not,

E n’sten più qui a chiarlar,

Balla pur chi vol ballar:

Mi n’ho assa’, Piron fradel,

Harè ben poc cervel,

Sa turnas più in qual rmor.


Piron

Eh, vgnì via, ch’Salvador

E Bastien s’en apassà,

Tut du insem, osù, turnà

A la festa, zia Sabetta.


Zea Sabetta

A i ho appù trop la gran stretta,

Quand a i ho vist qusi mnar,

E però a n’ vuoi turnar

In qul vilup zà mi pù.


Piron

Osù, tus, pregal vù,

Prché a so ch’l’as pigarà,

Ch’nsun n’guastarà

Più al festin, crediml’ a mi,

E mi par a dit qusì,

Ch’fin al dì vol ch’a balè.


Tuonia

Eh, mi mar, turnem, turnem.


Flippa

Sì, dgretia, la mia vecchina.


Zea Sabetta

Oh, mi vegna la ruina

Sa vuoi più turnar in dria.


Tuonia

Oh, crediv ch’la sia

D’mala fatta, sta vecchiazza.


Zea Sabetta

Ch’vot zugher pr una ragazza,

Ch’at darò d’l’ mattarà,

A n’voi mo più ch’ai turnà,

Sa creppiessi, oh, andà ben là!

Oh, Piron, menaz a cha,

St’ha pur voia d’farz survis,

Perché a mi al n’m’è ma duvis

D’haver mes in cha st’put.


Piron

Osù, putt, aviav là tut,

Za ch’la vecchia non ha voia.

Mo’ mi viegna a mi la duoia

S’an l’ho a mal slament pr vù,

Prché a so ch’la zuvintù

Cerca sempr l’allegrezza.

Mo’, com vien po’ la vecchiezza

Al n’s’arcorda più i piasir

Chi han apù, es n’pon sintir

Ch’una putta appa dal spas.

Osù, via varga a qual pas,

Cha sì homà pressa d’ca’,

Vultav mo qui per de zà,

Ch’andarì drit al purton.


Zea Sabetta

Osù, torna in dria, Piron,

Ch’a saven ben mo’ la via,

E dla bona cumpagnia

A t’restarèn tut ubligà.


Piron

Sì, sì, a vuoi mo’, ch’a m’unza

I taccun, osù, av las,

Andà pur tut quant in chias,

Ch’a m’havì chiarì, a la fe’.

Hosù, a vuoi turnar dstè,

A vder quel ch’s’fa,

Prch’an cred ch’al s’ballarà,

Ch’al ni è pur da ballar.

Mo ch’è qust? Oh, l’è al massar,

Ch’dì haver sintù al rmor,

D’Bastian e Salvador,

Es dì vler infurmation,

Ma a i vuoi dir, ch’al n’è nient.


Massar

Iet ti, Piron, ch’a sent

Favlar dria qual macchion,

Da to posta?


Piron

Sì ch’a son.

Mo’, und’andav qusi inienz dì?


Massar

Mo a vgnia fin qulì

Pr’intender st’bestrat,

Ch’a i ho intes ch’al s’è fat

A cha vostra dal rmor

Tra Bastien e Salvador.

Ch’t’sa ch’a son massar,

E ch’al m’tocca a dnuntiar

L’quarel in tal Turon,

E mnar anch’in preson

S’al busogna, ch’fa dal mal,

E mnar ugnun ugual.


Piron

Mo’ al n’uccor più, ch’a vegnà,

Prché i s’in atasintà,

E vuoi dir chi han fat la pas,

Mo’ a la fè, chi s’en ben squas,

Da da vera, tut dù,

E si n’ieran trategnù

Is diean d’bon budel.

Mo tra mi e Gabriel,

Havem fat chi sen basà,

E Bastian ha perdunà

A qul’altr, e ch’m’av dig,

U’ ni è più ngun intrig.


Massar

Oh, Piron, sat ch’at vuoi dir

L’not è fat pr durmir,

E no pr star a mattezar:

Mo at prumet, da ver massar,

Credmal pur da ver amig,

Ch’s’al n’fus pr Barba Big,

Ch’anca lù hare’ dal travai,

Ch’a vrè far altr’ che bai,

E slal fus altr che lù,

A vrev, cun dis quelù,

A la fè darv’ al malan,

Mo a farè murir d’affan

Al puvret, in quattr’ dì.

Ch’al n’s’daga despiaser,

Ch’andarò mi a pruvder

A tut quant quel ch’busogna.

In t’ugn mod, a vò a Blogna,

Dmatina, con al car.

Osù, archmandan a Gaspar,

A to par, e a Gabriel,

E’n fad più burdel,

Ch’ pr ades am la pass.


Piron

Osù, donca, mi ve lass,

Car massar, purtav ben,

Ch’à savì ben ch’av sen

Tut amig.


Massar

Osù, va’ mo

Un poc a far al fat to,

E n’m’rumpr più al zuccon

Ch’an so st’sa ch’a son

Un bamboz ch’l’intend,

Es so far d’l’facend

Quand’ l’uccor, e non d’l’ zanz,

E s’a vo’ a parlar dinanz

D’l’ bot a i supriur,

A n' insto a quant dutur,

Ha’ ma’ liet Buov d’Antona?

N’haver pora ch’a rasona

Mi per ponta d’gramatga,

Prché a i ho tgnù la pratga

Sempr ma d’huomn litrud,

E s’mi par havea d’scud

Al m’vlea far plucador,

Ma al puvret in t’un rmor

Fu buttà d’pia in sù

E mi armas un turlurù.

Pur, a i ho tant iudizij,

Ch’fra quel e un po d’vitij

Cha purtie da la natura,

Fin a qui, mi n’ho paura

Ch’ngun m’faga star.

Hosù, pur, a vuoi turnar

A durmir, za ch’l’è passà

A la via t’m’ha cuntà.

E stat tut aliegrament,

Ch’a farò ch’al srà nient,

Bona not.


Piron

Osù, andà san

A rvederz po’ dman.

A vuoi mo’ turnar a chà,

E dir al fat, chm’ al sta,

Ch’al haven hav’ d’bon

Ch’an sen andà in preson,

E dia vuoia pur ancora

Ch’dal tut an siama fuora,

Prché am sent l’ov mì,

Ch’la n’passarà qusì.

Mo a la fe’, ch’al m’agrieva

St’disturb, mo qul ch’a fieva

Al fieva sol pr quelle put,

Ch’gli havivan vuoia tut

D’scussar un po’ al grimbial.

Mo pr’ al prim Carnival

C’haven fat az sen cagà

Tut ados. Hosù, l’è sta

Pr al miei fuorsa pr nu,

Ch’an saren ballar mo più

Es srà finì al piaser,

Ch’al proverbij dis ver:

Ch’l’è miei, al dì d’ancua,

A trpper in sì linzua

Di eltr, che lassar trppar

In sì nuostr, e quest’è chiar

Prché i mat, cun se sa,

Dan a ugnun s’n’quij d’chà,

Dal trastul. Osù, patientia,

Al i è anch una sententia

Ch’sol dir: “Ch’n’fa, n’falla”.

Mo a vuoi mo’ andar a la stalla

A gvernar l’bstiol,

E lassar ballar chi vol,

E durmir po’ fin a dman,

Ch’i ho cors chm un can,

Es’ son strach chm’un asenaz

Pr azunzer st’ragaz,

E po’ ngotta n’m’è valù,

Ch’la vecchia n’a vlù

Ch’l’tornin più a ballar,

Che la possa vder crepar,

Sì ch’m’al dig, sta vechia scrova

Che ie vegna al mal dla lova

In ment, e in mez’ al grugn.


IL FINE