LE NOZZE DELLA

MICHELINA

DEL VERGATO

IN SANDRELLO

Da Monte Budello,


con il pasto rusticale fatto a li parenti ed amici

con l’ordine del banchetto, vivande e tratte-

nimenti ed altre cose belle da intendere.

Barba Galvan parla.

Da po’ cha sen qui tut,

Huomn, donn, e put

Insem cungregà,

Pr far st’ parintà,

Qui dla Michlina,

Fiola d’la Santina,

E dal barba Nuzent

Al qual è qui present,

Pr darla a Sandrel

D’Mingaz da Montebudel,

Al qual è apparecchià

E pront e preparà

D’bcarsela su

Prsent tut nu.

A srì donca cuntient,

A digh a vu parient,

D’fari dar la man

Prché qusì pian pian

A i spinzrà su l’anel.

Fat inienz, Sandrel,

A chi dighia rusgon?

Accostat al timon,

E vu, zia Santina,

Mnà qui la Michelina.


Zia Santina

Fat inienz, la mia fiola,

Mo’ cos’hat, mattazola,

Chal par t’vagh pianzand,

Quand t’diris andar ridand?

Dia m’fazza ben a mi,

Quand i mie m’drien marì,

Cha diss d’sì alla prima.


Zia Zanarda

Osù, via, t’n’iè la prima

Ch’sia arrivà a st’pass,

Crit ch la t’mnass

In luogh t’stiess mal?


Barba Galvan

Oh, potta d’fier buccal,

A vrè ben vder

T’vliss sgumbier

St’ parintà sì bon.

Mira ch pertgon

Da fil è quel ch’è là,

A so chal t’farà

Dal cert al to dver.


Zia Pandora

Eh, l’al diè ben vler,

Mo la s’diè vergugnar.


Barba Galvan

Osù, n’t’far pregar,

E fat mo inienz st’vua,

Chal sangu di mia bua,

Sam cruz ancha mi po’,

Dal cert a desfarò

Dal tut st’filatuoi.


Zia Santina

Osù, a vuoi ch’ t'al tuoi,

N’star mo più ustinà,

Vè chal t’tien guardà

Con l’occh dall’amor,

Ni dar mo più dulor

Prché al n’sta mo ben!


Zia Ghida

Osù, largh, ch la ven,

Tirav un po’ da un là,

Zea Lisa, und siv andà?

Su, prest, fav inanz.


Barba Galvan

Osù, muzzen st’zanz,

Fat qui da mi, Sandrel,

Cazza man un po’ all’anel,

E pruova sal si affà.


Sandrel

A ial pruviè pur là a chà,

Chal iandava d’sesin.


Barba Spinaz

Osù si va pr allegrezza

Dscargà qui arcbus,

E ti, Menga, con sti tus,

Andà inienz, cha vlen panbrar

Ch lè anchua ch s'ha da far

Al banchet dal noz,

Andai dria, barba Pigoz,

E vu altr ragazzun,

E tgnì bass i spuntun,

Chan dad in tal lumin.


Barba Sandron

Tuccà su qui rebeghin,

Cosa fav sunadur?

N'vediv ch'i balladur

S'cmenzan a scussar?

Sandrin, và là all'impar,

D'la to sposa ancha ti.


Barba Ton

Osù, a sen mo' tut qui,

Su, purtà al cadin in zà,

Ch'la sposa s'lavarà

Primament lia l'man,

E po' tut d'man in man,

Vgnì via, barba Sandron.


Barba Sandron

Ch'al s'lava prima ugnon,

Ch'a vuoi esser mi al dredan.

Vgnì via, barba Galvan,

Cosa fav zea Zanarda,

La Masina e la Lunarda,

La zea Ghida e la Dunina,

La Pandora e la Vanina,

La Sabeta, l'Allegrant,

E quel put tut quant,

Und' s'enl mo strafantà?


Barba Marchet

Gli en andà li dlà, in tal prà,

Ch' l' fan i suo bisogn.


Barba Sandron

Dsì ch' l' viegnin, barba Togn.


Barba Togn

Oh fiol, vgnì via dstè.


Zea Ghida

A son qui, che cosa iè?


Barba Nuzent

Su, lavav, e andà a tavla,

Cosa fav mo, Zea Paula,

Vliv esser sfurgunà?


Zea Paula

Mo l'è un pez cham son lavà,

Hosù, andà donca li dria,

Sedì zo, vu, zea Tadìa,

E ti Menga, e ti Tunina,

Ti Muretta e ti, Masina,

Ti Sandrella e ti Sabetta,

Tirà inienz qual banchetta,

E chiamà qul' altr putt,

Cha starì ben lì su tut.


Barba Sandron

Oh su, l'don en asstà

Chi huomin vagan da qu'l là,

E i du spus qui d'cò,

E vu, barba Nichlò,

Fad portar qui da biassar.


Barba Nichlò

Ma chminzà pur arrivar,

A quel piat d'guazzet,

Fa din là quell polpet,

Ch'al i arriva qui tusot..


Barba Pigoz

Ien si dur, sti munachiot!

Fai turnar un po' i' tal sped.


Pirin famei

Iensun lì c'hapa sed?


Barba Marchet

Damn a mi, Pirin fradel,

E po' met qui al fundel,

Fra nu du, con la mzetta,

Ch'in darò mi a la Sabetta,

A la Menga, e a la Taddia,

Met qui su qui du piattia,

Purtà via st' taiadel.

A fo brinds a Sandrel,

Es al fag anch a la sposa,

La n'manza qual tosa,

Metti un po' quel dnanz.


Michlina

An' in vuoi, ch'a n'ho davanz.


Barba Galvan

Oh su, tua sti du magon,

Con sta testa d'pizzon,

Che t'n'ha brisa manzà.


Barba Sandron

M' n'arriv' a qul aià,

Fadla un poc qui vsin.


Barba Savon

Brinds a vu, barba Santin.


Barba Santin

Oh, buon pro, barba Savon

Ades ades av fo rason

Es fo brinds lì a Tugnaz.


Tugnaz

S'am al fad, e mi al faz,

A la donna d'Maset,

Dam da bever, ti Minghet.


Minghet

Tulì qui, barba Tugnaz.


Tugnaz

Portal drit, balurdaz,

T' l'ha pur squas arbaltà.

Damel qui, fa l'altr là,

T'n' mal trag in sul barboz,

Tulì qui, barba Pigoz,

Sta mulena, ch'è per vu,

Dad qui l'grost a nu,

C'haven bona dintadura.


Barba Savon

Dam un po' una taiadura

D'quel manz, potta d'mi,

Oh, mandad al piat qui,

Ch'a l'apan un po' più destr,

Mi n'vuoi più mnestr.

Ch' al m'tira un po' al gaban;

Para via d'qui st' can,

Ch' l'ha fat un po' d'vent.


Zia Zanarda

Alla fe' ch'ancha mi sent

Qusta puzza, tira via,

Ch t'viegna la murìa.


Barba Nuzent

Paral via ti, Batston,

Chiamal, Pier.


Pier

Tè tè, lion.

Serral mo' fuora dall'uss.


Barba Marchet

A vrè bevr, sal ie fuss,

Ch min diess un po' un miol.


Batston

A son qui, ch'è qul chin vol?


Barba Marchet

A son mi, Bastston,

Alza pian instruminton,

T'n'm'l'arvers in sal cular.

Sposa, mi val torna a far,

Con licenzia lì dal spos.

An m'havì pur arspos.


Zia Santina

Mo n'vediv ch la s'vergogna?


Barba Marchet

Al farò donca alla Togna,

Zà ch vu nal vlì aztar.


Togna

Famal pur quant v'par,

Chan son sì vurgugnosa,

E ancha mi son sta la sposa

Es n'stie ma in s'la mia.


Barba Nichlò

Osù, fa in là qui piattia

Cha vuoi mettr lì st'cop.


Tugnaz

Oh a faren un bon intop,

Oh l'è bon, potta d'Zuda,

Al l'ha fat la zea Gnuda,

Cha savì s'la i fa bun!


Barba Galvan

Mo n'far sì gran beun,

Oh Tugnaz, và un po' più destr,

Crit quest sia mnestr?

Mo alla prima t'tocch al fond

Catlina, porz al tond,

Chat daga st'pzol,

Fav sotta, 'l mij fiol,

Con i tund ancora vu,

Cha vi metta quest su.

Al n'in tocca alla Sabetta

Ch la teia è un poc stretta.


Sabetta

N'min dat, chal n'importa,

Cha turò un po' d'torta.

Chi la purtan tuttavia,

Purtà qui vedi zia Lucia,

Chal ni n'è qui da st'co'.


Barba Minghet

Va un po' destr, Nichlò,

Mo t'men si l'man?

Dan lì a barba Galvan,

Mo ghiandussa, l'è finì,

San vegh altr, an n'harì.


Barba Galvan

A so posta, an m'incur.


Tugnaz

Oh, am sent cha i ho dur

A sta volta la panzazza,

Al bsogna cham dslazza

Qui dinanz un po' al saion,

Brinds a vu, barba Sandron!


Barba Sandron

Oh al me avis t'toc su.


Tugnaz

Mo a n'ho pur anch bevu,

Se n'dies o dods bot,

In st' po' d'scudlot.


Barba Sandron

Cancar t'manza, i puot durar?

T'prà ben mo' chiacchiarar

E tgnirz allieger tut.


Barba Pigoz

Oibò porc, l'ha trat un rut.


Tugnaz

E l'è stà un po' d'un suspir.


Zea Rizza

Sì, d'qui che s'fan sintir!

T'vultast almanch in là.


Tugnaz

Le crianz, che s'fa

Quand al ie d'la brigà

L'è signal c'haven del fià

E ch'an sen d'chanvaz.


Sabadin

Al dis ben al ver Tugnaz,

N'la sten a disputar,

Ch'ancha mi vrò esalar,

S'al mi vien l'ocasion.


Sabetta

Puost cagar iuocch e 'l magon,

E la milza e la corà.


Zea Santina

E dgratia n'parlà,

D'st'cos, car fiuua,

Cha'l n'è temp anchua

In presenza d'st'put.


La Masina

Sabadin, n'trar più rut!


Barba Nuzent

Tuot da tavla, Sabadin,

T'n'faz di purzlin,

In si pagn a la Tadia,

A chi dighia, tuot via,

E và duorm in t'la stalla.


Sabadin

Oh, la testa me tramballa,

Dslazzam un puchtin,

Car fradìa, cha son al fin,

Aidam, cha son mort,

Mnam un po' d'cò d'l'ort,

Cha vuoi far i mia servis.


Barba Nuzent

Osù, mnal dond al ve dis,

Chal s'possa un po' sburgar,

L'ha vlu tant sbevazzar,

Lu, e quel lov d'Tugnaz,

Chi ien cuot, sti du porcaz,

Mo Tugnaz ha bon cervel,

Es n'tem qusì al vassel

Mo qustu, quand l'ha dal bon,

Al s'insuppa com un zuccon.


Sabadin

Oimè, l'ara và d'intorn,

Menam lì, de dria al forn,

Cha vuoi far i fat mia,

Cha'l vien su la mercantia,

Fadi prest, ch'i vienin via,

Cha ni pos tegnir d'più.


Barba Sandron

Strenz i dient, e guarda in su.


Sabadin

An pos, fuzì fuzì.


La Sabetta

Puost creppar, mo ti n'vì

Chal ma tut impì al grimbial.


Barba Galvan

Purtal via, perché al sta mal,

E nu dem luog a qustor,

Chi pambaran mo ancha lor,

E artirenz la in tal prà,

Cha l'è 'l cart apparicchià,

Es farem a lamberchion,

Andà là, barba Simon,

E vu altr, tut quant,

Perché i spus n'volin tant.

Occhi sovra, al dirv al ver,

Ch'ancha lor volin pser,

Fars fest un puchtin,

Senza haver nsun vesin

Chi stia sopra a sberlocchiar.

Osù, andà un poc a dsnar,

Sunadur, ch l'è al dver

E po' vegnì là, sot al per,

Ch m'havì ben gunfià ballun,

Chal ij srà sti ragazzun,

Tut quant lì rdut,

Es faren hastar st'put,

Fin ch'è hora d'far d'la suoia,

Prché a cred ch l'n'happin vuoia,

Osu, andà tut a dsnar,

Chal bon pro v'possal far,

Chmod fa l'orz al grue.


IL FINE