LA ROSSA

D'ALVERGATO

LA QUALE VA CERCANDO

patrone in Bologna,


dove s'intende tutto quello che sa fare una bona

MASSARA


cosa molto ridicolosa da dire in maschera, e su le

veglie in questi pochi dì di Carnevale,


in lingua rustica bolognese



LA ROSSA

Bondì, bondì, brigà,

Ie nsun in sta cuntrà

Ch'vuoia una massara?

S'a son ben montanara,

E ch'a sia mal vestì,

Per quest a n'psì

Saver quel cha so far,

Mo s'a stad ascultar

Av dirò ch'a son,

E anch la cason

Ch'm'ha cunduta qui,

Perché a bram ancha mi

Ch'qualcun m'chgnossa.

Am' chiam la Rossa,

Di mal accumpagnà,

Ch'fu zà maridà

In Cech' stintarin,

Al qual iera un fantin,

Ch' s'fieva rsptar,

Es n'iera un so par,

In tut qui chmun.

Lu rich d'marun,

D'fig e d'castagn,

E po' al mior cumpagn

Ch' fuss in qual cuntà.

Al sa tut al Vergà

S'gliera da cuel

Es liera un cervel

Da metr in statut.

Al fieva po al saput,

Es iera un parlador

Ch'al' l'instieva a un dutor,

Per dir la so rason,

Liera chiamà da ugnon

Sovra ugn diffrientia

A dar la so sententia,

E sovra ugn bstrat

Al n'è si destr un gat

Cun liera in tal saltar,

E po pr clafar

Al n'havea parangon,

Gliera po cumpagnon

Es havea dal tascar.

Oh, ch cervel bizar

S'a fort al s'ballava,

Liera quel ch'aviava

Sempr la festa, lu,

E cun s'fa da nu,

Liera po calsent

Al tgniva la zent

Sempr in piaser e in spas,

Al n'era trop gras,

Mo nianch trop sut,

Al piasea mo a l' put,

A sempr liera in bal,

Mai n'mteva in fal

Un pè, tant ieral nech,

Al fieva star a stech

Tut quij d'qual chmun,

Al purtava i schfun

D'ugnhora dsligà

La daga intarsià

Con un bel curzin

Al parea un paladin.

A ch al guardava fis

A m'arcord ch al m'dis:

Rossa, cara surella,

S'l'at vgnes bella

D'farm dshunor,

N'intrar in qul humor,

Chat' in farò pintir,

Prché al vuoi mantgnir

Pr'fin ch'a sto in st'mond,

E s'ben a par sì tond

N'm'haver pr un galavron,

Ch'a son un bstion

Ch'so po' far dal mal,

Es so quant sal

Và a salar un purchet,

S'a son ben puvret,

A son rich d'hunor.

Donca, portam amor,

Prché a tin port a ti”,

Al dis quest un dì,

E l'altr al s'ammalò,

E in quattr dì l'andò,

A star con quij d'là,

E mi ristà d'zà,

Con quattr fansin,

Qui niera pan n'vin,

Chi sghier l'havea manzà

Es iera consumà,

La roba tutta tutta

Cha rstà in s'la sutta,

Con quattr criatur,

Haviva du spartur

Una cassa schiappà,

Un mangh da furcà,

Do travers e una saia

Un bon let d'paia,

Do banch e un vaslet

Con altr cuslet

Con sre gramit e gram,

Ch tut, pr la gran fam,

A li ho tut vindù,

Es n'm'son tgnù

Altr che una stanella,

E questa cuttarella,

Cha port qui d'sotta,

E sta traversa rotta,

E un po' d'plizzon,

Mo a iho quest d'bon:

Ch'almanc a son da ben.

Es a port in sen

Tutta la mia hunstà,

Cha son sta rcercà

Più d'cinquanta bott,

I currevan d'not

Con fa li av al bus,

I parean can sgus,

Ch'andasn brachzand

Prché là in qul band,

A nal digh pr ludarm,

Né manc pr vantarm,

Cha nal son us a far,

Mo al n'spsea truvar

La più bella d'mi,

E massim da quij dì

Cha iera in sal mie fior.

A mal dsea la Fior

D'barba Tmasin:

Rossa, qual musin,

Fa inamurar ugnon,

T'ha un occh d'falcon,

Al nas prfilà,

Quij labr d'rusà,

La vita ben furmada,

In fin, ti è sì garbada,

Cha diral qui tra nu,

Al ni è nsuna zà su

Ch' t'arriva al calcagn,

D'trentasie cumpagn,

Ch s'trovan in sta villa,

Chmonzand alla Camilla

D'barba Pelgrin,

La Menga d'Tunin,

La Iachma d'Zanon,

La Tuonia d'Piron,

La Flippa d'Sandrel,

La Pluonia d'Msel,

La Bartolda d'Simon,

La Urslina d'Mason,

La Bastiana d'Magnan,

La Lurenza d'Galvan,

La Biasia d'Zannot,

La Salvestra d'Mazzot,

La Dminga d'Pighin,

La Tmasa d'Buchin,

La Francesca d'Paluz,

La Zuanua d'Paruz,

La Paulina d'Bdet,

La Carlina d'Marchet,

La Sabetta d'Piraz,

La Cecilia d'Buttaz,

La Lucia d'Mattarel,

La Tadia d'Manganel,

La Mattia d'Rumgon,

La Sabella d'Maron,

La Mantina d'barba Riz,

La Bendetta d'Paiariz,

La Biatris d'barba Mas,

La Bertina d'Zervas,

La Iustina d'Magrin,

La Dratia d'Nasin,

La Lianora d'Furnel,

La Lucretia d'Mastel,

La Ptronia d'Zanard,

La Zirnonma d'Guizard,

La Plgrina d'Vanicchi,

E la Lena d'Cavicchi,

Ti er tra tut quest put

La più bella ti d'tut”.

Ohimè, la dsea ben ver,

Chal n's'pseva za vder

La più bella maschiotta:

I currean tut in frotta

Pr vderm, i ragazzun,

E con schiuop e con spuntun

Im fievn rsptar

Es s'vlevn ammazzar

Dl' bot in fra d'lor

Es fievin di rmor

Pr mia amor ugn dì,

E po' son vgnu qusì:

Magra, brutta, sozza e ranza,

Ch'al m'casca zo la panza,

Ch'al grimbial n'sta più su,

Es sogn sì dvgnu,

Ch'mi viegna la sintientia

Al n'im manzarè scarienza

Tant sonia malandà.

Mo lassema andar da un là,

Tut quant st'rason,

S'al ie fus qui un patron

O patrona, ch'm'vles,

Ch'im' provin ades ades,

Chi vdran quel cha so far,

An m'vuoi mo' vantar,

D'saver far i piè a gat,

Mo av dig ben cha so qui fat

Ch' van fat in t'una cha,

Mtim pur a far bugà,

E lassam po' far a mi:

S'an la faz in t'un dì,

Cazzam pur po via.

A tuoi d'la lsia

Es fo la savunà,

E po' ch'm'a l'ho smuiada,

A la compon a un trat,

E po cur d'fat

A tor al cenrandl,

Es viegn accomodandl

A ch' mod l'ha d'andar,

Es al cunz par par

Atorna a l'urel,

E po' tuoij un crivel

Es val ben ben la cendr

Prché al bsogna atendr

Chal ni sia di carbun,

Di chiuod o di madun,

Ch'amacchin la bugà,

Ch'm'ha l'ho po ben valà,

Atac su al parol

E senza altr parol

A i fo un bon fuog sotta,

A po, quand al barbotta,

E ch'al tra' l'onda in su,

A i but la cener su,

E po m'tir indria,

Azzò ch'la lsia

N'm'salta in tal mustaz,

Over in s'l'braz,

E po vag d'trot

A tor al msqulot

Ch's'adovra a qual lavor,

E quand l'è più in bulor

A but po in si pagn

In mez, e da i vivagn

A fo ch'la va pr tut.

Quand al parol è sut

A l'imp un'altra volta,

Prima din tal parol

Es in tro' qunt in vol

A dirl in conclusion

E po avr al canon,

Quand a la vuoi cavar,

E po la vo a lavar

A un poz o in tun fussà,

E lì, tutta sbrazzà,

A lav prima i strazzua,

E po dria a i linzua

Over a l' camis,

E sal iè su di sfris

A tuoi un struffion

E lì, con dal savon,

A ti in dagh una mnà,

Vultand da ugn là:

Pr far chi viegnin net,

Av so dir mi cha i met

Tut quant al mia cervel.

Po tuoi al matarel

S'al iè dla tela nova,

E prché a i so cha i zova

A bastunarla ben

A ijndo tant ch'la ven

Pastosa e mulsina,

Ch'la par propria urtighina

S'ben l'è filindent.

Mo quest è po nient,

Mtim a dar la salda

E vedì sa starò salda

A tut l'fadigh

Ch'in manc ch'an digh

A tuoi qui fazzulit

Cupit e cularit,

Es m'in vo là in tun prà,

Dund a iho aparchià

La salda in tun catin,

E qusì, pianin pianin,

A i la chmenz a dar

Es i sto lì a tirar

D'mentr chi s'van sugand,

E po i viegn pigand

Quand a i ho ben sugà,

Es i met qusì lì pigà

In qualch panirola,

E senza far parola

A guad s'l'è sutta,

L'altra bugada tutta

E qusì a la viegn cuiand,

Es la viegn purtand

A la volta d'chà.

E ch'm' a l'ho pigà

A l'arpon in l'cas,

E po mi dag spas

Chm a i ho mes zo al cruoij

D'metri d'l'fuoij

D'lavanda e d'ros,

Ch'tut quest cos

La fan saver d'bon.

Oh, dsim po sa son

Prfetta in cusinar,

Cha farè da manzar

A un re, a un imprador,

A so far dal savor

D'ch sort a a savi dir

Es so ben impir

Un pullastr e un cappon,

E far di maccaron

D'l' tort e di turtìa,

Sovra la fed mia,

Cha v'digh al ver adess,

O vlì pullam o pes,

Purtam quel cha vlì,

Chan m'part d'lì

Fin chal n'è stasunà,

E po' al met lì da un là,

In qualch pgnatella,

S'l'è pes da padella,

Al lav, s'al bsogna,

Es i grat ben la rogna

Prima con un curtel,

E po' al met in chuel

Qusì cunz in sal taier,

Fin ch'vien al msier.

E po' al friz in tun trat,

Mandand fuora al gat,

Ch'al n'mal lecca via.

Prché a n'dit busìa

Sti gat la solin far,

A hor d'dsnar,

A son lì, pronta e destra,

A dar la so mnestra,

In la scudella a ugnon,

E mi po' al crdinzon,

Manz in pia, cun s'fa

E po' ch'm' aiho dsnà

A lav l'scudel,

E si do dri a l'urel,

Tant con un struffion

Ch'al mand al parangon

D'l'or e d'l'arzent,

Tant vienin lusent.

S'havì po' un amalà,

Ch sia mez astumgà,

E ch n'possa manzar,

Lassamal governar,

Un pochtin a mi,

Prché mi a met lì

A sedr appress al let,

Es i met un cunfet

Qusì d'l'volt in bocca;

E sal dis cha l'imbocca,

Ancora al so imbuccar.

Sa i faz da dsnar,

A i fo una panadina,

O la so mnstrina,

Over un po' d'orzada,

O d'la mandolada,

O ch'a i do un bcunzel

D'carn d'videl,

Over d'bon castron,

Anchora del capon,

Over qualch uslet,

O cha i faz un brudet,

O ch ai do un manscrist,

Over cha i fo dal pist,

O un po' d'cunsumà.

A i tegn cunfurtà

Con tut quel cha so.

E s'al fors n'al po

Sburgars pral canal,

A i faz un servitial

D'malva e marcurella:

Es tuoi una scudella

D'brod e d'uogli bon,

Con un po' d'savon

Da unzer la calcetta,

E po m'met in la stretta

Dal let, chma savì,

Tirandal vers mi

Es i par su vergon

E po i met un cuccon

Chal tiegna ben srà

E po al tiegn saguatà

Ch'al par un barilot

E po i vag d'trot

A tor al cantarin,

E qusì, cun tal latin

A i fo far la cachina

Quand l'è po' la matina,

A i cuos un ovadin

N'pinsa ch'a i daga vin,

Né schiet né adaquà,

Pr fin ch'n'è passà

I dies, o i dods dì,

Es m'invò dria qusì,

Pr fin ch'al n'ha più mal.

A far la servitial

A una donna d'part

A so tutta l'art,

Chi va fin a un quatrin

Am liev a i mattutin,

A darij un po' d'brod,

E si met con bel mod

Un po' d'cuminà,

O zaffaran sfurzà,

O un poch d'cannella,

Con certa altra nusella,

Chi zova pur assà,

E po', con l'ha posà,

A i do do ov fresch,

E po' apparecch al desch,

Over al quadrettin,

E sì amanv al so vin

E la so qulation,

E prima al so cappon,

Over la so gallina,

Un quart la matina

E un altr pr la sira,

A vuoi che la sin tira

Al dì, du o tri past,

E po', senza cuntrast,

A i port lì vesin

La so suppa d'vin,

Es i la fo manzar

Azzò ch la possa far

Dal lat a i fansin,

A i do di zuccarin

O un po' d'marzpan,

E qusì d'man in man

A la vo governand

E talment impizzand

Ch'quand' le d'co dal mes,

L'ha al corp sì gras e stes

Ch'la n'po' star in la pel,

E tonda in le massel

Ch'la par un beccafig.

Oimè, mo a n'v'dig

Sa govern po ben i tus,

Cha iho quest pr us:

D'vler chi sian pulid,

Basta cha senta un crid

Al liev, es al desfass

E sì mud l' fass

L'pez e al linarol

E sì fo al so bagnarol

Ch'mod s'usa a i fansin,

Es i lav al culin

E sotta a la lasina,

Ch'a savì ch' l'urina

I rosga pur' assà,

E ch'm' a l'ho ben lavà,

Al torn arfassar,

E po' al port a so mar,

Chi daga la tettina.

A i fo d'la pappina

Tri o quattr bcuncin,

Azzò ch'al si avìa

Sovra la fed mia,

Cha i faz al so dver,

Ch'nsun n's'po' duler

D'mi, pr tal affar.

Mo Mtim po' in tel telar

A far un distrigà,

Ch'a vuoi ch'av strupà:

A pij in man la spola

E senza far parola,

A la tro' inanz e in dria,

Es tien mnà di pia,

Dment cha vo buttand

E al subij va ingrossand,

Ch' a pena am'n'adò

A tal ch'at m'in fo

Sia o set brazza al dì,

Mo a vuoi ben ancha mi

Ch'l'am sia inbusmada spes

Azzo che quand a tes

La sia più mulsina

E ch'la sia fissa e fina

Quand l'è zo dal tlar.

Anchora a vuoi cuntar

Pr cont d'l'agocchia

Ch'an son una marmocchia

Achmod av pinsà

A so d'qui qutà

Chi ij disin passaman

Ch'in fat a bus pian

E larg quattr dida

Dgratia, n'sun n'rida

S'a parl qusì mal,

Prché con al didal

An n'ho parangon:

So far l'urel matton,

Al gasg a un fazzolet,

Punt mort e cavalet,

Punt in dria e sot man,

Dam pur l'agocchia in man,

E lassam lavurar.

S'am vrì po adovrar

Pr donna da gvern,

Darim pur in gvern

Tutta la casa a mi,

Prché d'dì in dì

Avanzarì chuel

Prché con l'dunzel

E con i srvitur

E ialtr manzadur,

Ch'tirin zo da mat:

A strinzrò d'fat

A tut la msura.

Lassa pur po' la cura

A quella ch'sa far,

Ch'si vran manzar

Con la testa in tal sach,

Sguazzar e vivr a mach

I vivran dal so'

Prché mi tgnarò

L'chiav dal mia là,

Es tgnarò chiavà

Prfin al sulfanìa.

Dsì po cham tiegnin dria.

A far blin blin

Cha ni darè un tantin

Da la so part in fuora

E malament ancora,

Pur ch pussibl fuss,

Mi vregna pur al flus

S'a ijn dies volontera.

Anch pr camariera

Am farè accomodr,

Es ben an'so far

Cun fa quest dunzel,

A iho sì bon cervel

Ch' a impararò in tun trat,

Es gaffarò d'fat

La cosa cun la và,

Es son amaistrà

In part a far i let,

Cunzar i bancalet,

Rmetr i sparavier,

Fregar cas e furcier,

L'credenz e i armarij,

E po' pr l'ordinarij

Servir alla patrona,

E po' srev bona

Da mil altr facend

Al iè qui ch'm'intend

Senza cha la dichiara.

Ch'vol donca una massara

N'm'lassa pr quattrin,

Ch'a vdrì alla fin

Cha srì cuntent tut,

E ch'arì bon construt

Sempr dal fat mia,

Prché an'm'tirin dria

Za ma' quand al bsogna.

Es son vgnu a Bologna

Pr far quel cha a ho dit,

E pr piar un drit

D'quant a iho da far,

N'v lassà scapar

Donca sì gran vintura,

Tulim a la segura,

Cha son da dar a tai

Es ho 'l mi bagaij

Purtà tut con mi.

Hosù, vdim qui

Parà pr far di fat,

Bcam sù in tun trat

E n'm' lassà partir,

Prché a vuoi mantgnir

A quij dund andarò

Ch'sempr ma a srò

Da godr ugn di più,

Es ben a viegn d'in su

Dal part d'Alvergà

A son po ben crià

E s'ho di bia custum

E n'guarda chal fum

M'apa trata sì mal,

Prché quest'è un sgnal

Ch'an vag scursaiand,

Né manc civetand

A casa d'nsun.

Osù, sal iè qualchun

Ch'm'vuoia in sta città,

E ch'vuoia sgurtà,

Sgond ch'vuol l'usanza,

O qualch cugnsanza

A i la darò in tun trat,

Tiren pur al cuntrat,

Ch'mi n'mancarò

E dal salari po

A l'armet in vu.


IL FINE