LA

SCAVEZZARIA

DELLA CANOVA


Di Barba PLIN da Luvolè,

dove si sentono varij detti e motti piacevoli

alla contadinesca,


con il lamento di un scavezzadore, ch'è quasi cre-

pato per haver mangiato un catino di sughi

e dieci pezzi di torta.

Persone che parlano


Barba Plin, rzdorr e patron d'casa


Barba Andriol e Barba Innucent, vecchi


Zannin, Bastian, Bdet, Iacmin, Mingon, Galiaz, Tuniol, Salvador e Sabadin, tutti figliuoli di Barba Plin e tutti scavezzadori


Zia Giovanna, moglie di Barba Plin


Sabadina, Maddalena e Rosa

Barba Plin chiama la so fameia.

Horsù, tus, ch'stenia a far?

N'vlè mia scavzar

Mo sta canva un puchtin,

A chi dighia mi, Zannin?

T'sta lì, es t'guard in su,

T'par propri un turlulu.


Zannin

Cosa dsiv, chan vo badà?

Cha badava a qula quta

Che la su ch'vol cascar.


Barba Plin

Ch't'importal? Lassal star,

Cha vrè da st'ann in là

Chal cascas zo la cha,

La Tiezza con al forn,

E si appias al fuog intorn

In t'agn mod az parten,

Chal patron za da cumià,

E s'ho intes chal l'ha dà,

A Minghet dla Pusison,

Sì cha mudaren patron,

E per questo fa spes

Na vrè chal iar magnes

Una preda d'qual mur,

Guarda mo' sasn n'incur

D'qual legn ch'vol cascar,

Ch'i pensa chi a pinsar

Arspondem pur a mi.


Zannin

Dsì pur, cha son qui,

Per far quel cham dirì,

Chan v'haveva ben vdì.


Barba Plin

At dig chal m'par

Ch'sia hora d'scavzar

Mo sta canva,

M'hat mo intes,

Ch l'è squas un mes

Cha l'haven sot a la tieza,

Es vuoi ch's'adlieza

La bona da la trista,

Cha i n'è d'quella ch'è pista

Es è tutta timpstà,

Tutta storta e mal andà,

Chan vui cha la mischian.

Chiama un poc Bastian.


Zannin

Bastian vien da mi par.


Bastian

A son qui, chi è da far?


Barba Plin

Chiama un poc la Tadia

Qui da mi, su, mov i pia,

E ti, chiama la Zintil.


Bastian

Mo l'è lì, d'drie al purcil,

Ch'la gverna i purzlin.


Barba Plin

Dij chla vaga un puchtin

Via d'qui, a chiamar sti put,

Ch'sta sira el sien qui tutt

Cun i mattar alla via,

Cha faren la scavzaria;

E ti, va', chiama Mingon,

Con i tus d'Barba Ton

E mena anc Sabbadin,

Cha ridren un puchtin,

A sentir l'so nuvel,

Ch'a le dis tant bel

Il bot quand al med,

Ch'al farè ridr el pred.

Os, va' prest dund t'ha d'andar,

Und iet mo ti, Bdet.


Bdet

A son qui, ch'vliv, mi par?


Barba Plin

Vat mo, arrapa in qual nuson

E cuij tut qul' albanon,

Ch'al s'faga una mnà

D'sughi, ch'sian dulz e amlà.

E la Tunia prest sdazza

Dla farina, e ch's fazza

Do o tre tort, prstament,

O d'mij o d'furment,

E ti, lassa star qui bua,

E va', mosta un po' qul'uua,

C'ha purtà in cha Bdet,

Es tura qual parulet;

A ti dig, vè, Zan Pol,

T'm'intend ben, qual parol

A t'vui dir.


Zan Pol

Sì, sì, a v'intend ben,

A vlì dir qual cha duvren

A plar i purzlin.


Barba Plin

Sì, sì, quel, e fal pien

D'sughi. Osù, camina via,

Prché a sent in sla via

Dla zent rasunar,

Chi sran quij ch'vienin a scavzar.

Ijn ben dis? Vgnì pur via,

Oh che bella cumpagnia,

Es e sieg Barba Andriol,

Sie il ben vgnu l'mie fiol.


Barba Andriol

Bona sira, Plin, ch'fat?


Barba Plin

Mi sto ben, e ti cun stat?


Barba Andriol

Eh, a qusì qusì, ve da vecchiet,

A camin cun al bachet,

S'pua pinsar al rst poì ti.


Barba Plin

Oh Anderiol, l'è andà quij dì

Cha vui dir, fradel mi car.


Barba Andriol

Eh, d'gratia, n'm'iarcurdar,

N'm' far murir d'affann.


Barba Plin

Dim un poc quant ann

At mo, Andriol fradel.


Barba Andriol

An t'so dir apnel

Tropp ben qusta zirandla;

A so ch'l'ann dla Mirandla

A spusè la mia Sabetta

Ch'l'am lassò, la puvretta,

Prupri l'ann del mal matton,

Chal la puns un galavron,

Es la fiè tutta gunfiar,

Es murì dop al paiar,

In tal far i sua bisugn,

Ch' l'iera al mes d'zugn,

E Brnard e Gagliaz

E tutt quant quij ragaz

Ch't'ha vist mnar i bua

Ien fiua di mia fiua:

Pensa mo quant a n'ai ho.


Barba Plin

Mo tarva, s'ben a fo

I mie cunt, t'pass i stanta.


Barba Andriol

Hari inienz, dì pur utanta,

E po azuntin quattr drie,

Cha n'havev cinqu o sie

Iniez ch'passas Barbon,

Cha m'arcord quij in lumbrgun,

Cha vedeva quij suldà

Ch'passavan pr la strà

Tutt quant cargà d'fer,

Es m'arcord chiz tosn un verr,

Quattr piegr, e du castrun,

Es bruson tutt al chmun

D'BAzan, e dla Mzulara,

Es mnon via una massara

D'Pighin da Cadrian,

Es ligon barba Galvan

A una fioppa in mez al prà,

Es dien del bastunà

A Minghet dal Ulmadel,

Es manzon un videl

D'Battista da Tignan,

Es iarston ben al gaban

Prest a lu, cun un rameng,

Es manzon a Barba Meng

Du bric, gras abragà,

Basta, i fien del mal assà,

Quij ribald malandrin,

I castravin i cuntadin

Cun s'fà propri i purzia ,

I amulavan i vassia

Pr la canva, i traditur,

E po' devn in ti tambur

Es fievan algrezza,

In vlevan pan d'vezza,

Ma sì ben pan affiuccà.

Chi n'haveva era bussà.

At dig dla mala fatta

Es dsevin: “Và, m'accatta

Dal bon pan, villan cuchin”,

I tulevn i manarin

Es stlavin i furcier,

I sfurzavan l'muier,

Cosa n'fievin mai, qui ladr,

Cha sintea dir a mi padr

Tutt quant sti facend,

Prché mi, chmod t'intend,

A i era allora un burdlet

Poc più dal to tuset,

Es m'è avis chal sia un insuni

Al vder d'qui dmuoni,

Ch' passavan pr al chmun,

Carg d'pic e d'spuntun,

Chal n'i era alor in us

Tent diavl d'arcbus,

Cmod s'usa da sti dì,

Ch'mi cred, a dirla qui,

Ch'al fuss lu ch'la truvas

In l'infern, e chal purtas

In st'mond certament,

Prché un furb e un insulent

Psea star dop un machion,

O in t'un foss da quaiton

Amazzar un hom da ben

E agn dì par cha sintev

Qualch mal, fradel mi car.


Barba Plin

Oh Andriol, ch'vuot mo far,

L'è al mond ch'da qusì

T'vi ben anc ch'agn dì

Ijn castigan qualchdun;

Os l'è qui sti ragazzun

Chin vgnu pr scavzar:

Oh, av prumett c'havem da star

In sta sira alliegrament,

Es e sieg barba Inucent

Cun la zè Ghida anca lia,

Pr farc bona cumpagnia

Oh, siad pur i ben vgnu,

Cha farem d'fatt d'più.

Osù, tus, purtà in t'un trat

I bancun, e ch's'amanva

Prestament qusì qui dlà canva.

Ch'sti put tgnaran

E sti zuven scavzaran.

Iacmin, porta 'l brancà

Vien qui, Pier, da l'altr là

Und vat mo, Sandron?


Iachmin

Al va dopp a qual machion

A far fuorsa i fatt sua,

Dapo' che al temp da l'uua

Al n's fa altr che squizar.


Barba Plin

O va via, puost crepar,

E spidisla pur castrel,

Dam in za qual mattarel,

Vè Zanin, e vu, ragaz,

Impià di canvaz

In s'l'ara, cha i vedan

Chan z'dema in s'il man,

Hosù, via, da palladin

Toc tic tac, dai ben Tunin,

Tucca via, su ben gaiard,

Dai ben, Piron, dai ben Bernard,

Spinz inanz Catlina,

Cosa fat, Sabadina?

N'vit sti fa stintar

Spinz inenz, ch'stat a far?


Sabadina

Mo an si ved da st'là

Tuot dinanz ti qutà,

A ch'dighia, tuot via,

E tra' su di canaria,

Dam dla canva, Iacmin,

Fa ben fuog, vè, Pirin,

Mo discostal dal paiar,

Chal srev altr ch'burlar,

Tich, tich tach, toch,

Oh, Mingon, t'par un zoch,

Ti t'addurment, galavron,

Canta un poc una canzon.


Mingon

Mo a v'in dirè ben più d'quattr,

Mo an s'po cantar e batr:

Chal la canta Gabriel,

Chan da ovra al mattarel.


Gabriel

A niè par a Sabadin,

Su, tua un poc al rbghin,

Prestament e lievan una,

Vet sal vuol livar la luna.


Sabadin

Al turò ch'm'haven finì,

Es farò quel cha vlì,

E savì a n'ho imparà

Cinq o sie, chin pur garbà,

E so quella dla Togna,

L'altr dì a la toss a Blogna,

El nozz dla Michlina,

Se a n'ho più d'una vintina

Finem prima d'scavzar,

Lassam pur po mi sbraiar.


Barba Plin

Sabadin a ben parlà,

Finem prima sta qutà

Po starem alliegrament,

Ch'in dsiv, Barba Nucent?


Barba Nucent

L'è ben ver, mnen pur le man,

Iet strac, Bastian?

Dam un po' al mattar a mi.


Bastian

Deh, tuliv un poc d'qui

En fadi tant zanz,

Paulina, spinz inanz:

T'm fa mnar a vuod.

A chi digghia mi, t'n'od?

Mo ti tier addurmintà?

Cha psè ben tgnir mnà

Chan deva in s'ingotta

Osù, via, para mo sotta

Hora ma' a sen al fin.


Barba Plin

Cosa fat, Sabadin?

Cha sent ridr quel putt?

Dì al ver, at tratt un rut,

O at fatt un poc d'fià?


Sabadin

L'è cha son innamurà

Es m'è scapà un suspir,

Chan lo psu tgnir.


Barba Plin

E si quest n'n'è nient,

Dai pur via alliegrament,

S'ben la fatt un grlinghin,

L'è che amor al tira al fin,

Mo ch' sentia da qual là.


Sabadin

L'è Mingon ch' s'è allargà,

Un tantin ancora lu,

Pr d'drie, l'haviv sintu.


Barba Plin

Ap al cor a quel ch't'fa,

Oh Mingon.


Mingon

Mo al m'è scapà,

Un suspir ancora mi.


Sabadin

Oibò, porèn, tuot d'qui,

Ch' t'zi è vgnu a morbar

In fan altr s'in scurzar,

Tutta sira sti asnaz.


Barba Plin

I è più canva, Galiaz.


Galiaz

A i n'è anc do brazzà.


Barba Plin

Osù, prest, chla sia purtà

Cha finema pò in tun trat,

Ch'andarèn a bevr un trat.

Ch'm l'è cunza cun la và,

Ch' dman, s'dia vrà,

A la gramaren po tutta.

Ai n'è d'l'altra, ch'n'è sutta

Ch'è dstesa là in tal prà,

Chal bsogna cha turnà

A far l'altra scavezaria

Dman d'sira, i mia fradia.

Os andem un poc a cena,

Vgnì via, zè Maddalena,

E chiama quel fiol,

Vien in cha, Andriol.


Andriol

Andà pur inanz tutt,

E mtì a tavla qul putt,

Ch' fin dman a scavzar,

Ch'mi son stà a guardàr.


Barba Plin

Osù, via, levat mo su,

Oh Zuanna, e'n star lì più,

A zanzar con qulor,

Porta in tavla, Salvador,

E ch's taia qula torta,

E ti serra qula porta.

Vè, Tugnaz, osù fiol,

Agafà al vostr pzol,

Mo ti tai qusì pznin,

Crit cha siama fansin?


Zuanna

Asptà un poc, sa vlì,

E dgratia n've smarì,

Cha n'ho fatt fin a quattr,

Guardà vu s'harì da sbatr,

Do d'furment, e do d'mij,

Quest'è la part di famij,

E quest'è quella d'qui tus,

Mo is l'attaccaran tutta al mus,

A chi dighia mi, Ziron?

Spuda fuora qual bcon!

Mi chi si ch' t'affugarà,

O ch'lov al s'è scutà

Osù, tas, chal n'è ngotta.


Barba Plin

Mo n'sental sla scotta,

Al mnchion, mo dì chal pianz,

Cola fat, ch't'n' la manz

Adess mo ch'l'è arsurà,

E ti vuot esser imbucà.

A chi dighia Niclò,

Manza su, cha n'andarò

A purtar d'l'altra adess,

Qual piatel, tiravl appress,

E arriva dgratia tutt.


Sabadin

Am sent al bech sut,

Dam da bevr Tuniol.


Tuniol

Manza d'torta st'pzol.


Sabadin

Mo und vuot cha mal metta,

Ch'ma io finì sta fetta

A m'in son tirà in sal pett

D'sti piez fin a sett.

Es sent chan poss più,

E spidism mo, osù,

A darm un pò al maiol,

Cha vuoi far a sti fiol

Brinds, o impal po far mi,

O s'al faz a quella lì,

Ch' sta volta d'sturzun

Chan la ved s'n'in tun gallon.


Maddalena

Sient, Rosa, al dis a ti.


Rosa

Fadal pur a quella lì,

Chan m'intend d'qual mstier.


Sabadin

Fav impir un po al bicchier,

Chav dirò mi cun s'fa,

E vultav un poc in zà,

Chav vega in la ciera,

E accettal vuluntiera

En fadi la schivosa.


Zuanna

L'è ch'sta putta è vurgugnosa,

E s'è ancora pura cosa,

Fal pur lì alla Maddalena.


Sabadin

Osù via, cja son d'vena,

Maddalena, a dig a vu.


Maddalena

Vgnì pur via, e'n stadi più,

Dam da bever ti Mingon,

Ch'anca mi i vui far rason.


Mingon

Asptà, cha in vaga a trar.


Sabadin

O và via, puost crpar

En lassar mancar al vin,

Cosa è quest, Barba Plin,

Chiz portin in le scudel?


Barba Plin

Mo ijn sughi, car fradel,

Cha n'ho fatt far un parol,

Cham par chal dver vuol

Cha in manzan un scudlot

Pr'on, mo guarda t'n't'scot,

Chi ian tolt ades dal fuog.


Sabadin

O quest sì ch'è al mi zuog,

Ini dulz? Sì alla fè!

Oh, purtamin pur in zè

Un cadin, qui da pr mi.


Zuanna

Un cadin, mo vetal qui

Es tien duods scudel.


Salvador

Al t'creparà la pel,

Sabadin, và destrament,

T'sa t'patis un po d'vent.


Sabadin

Salvador, fà i fatt tua,

E và all'olla stin vua.


Barba Plin

Sabadin, n'in manzar più.


Sabadin

Andà in chias ancora vu,

E n'm'stadi a insturnir,

Cha i ho qui, e si vuoi finir,

E s'in vui cha m'n'avanza,

S'al m'dses crpar la panza,

O vdì po far al mond,

Sa io fatt vder al fond,

Ch'n'dsiv, Barba Nucent?


Barba Nucent

A digh mi ch ti è valent,

Mo cosa at t'tien buffà.


Sabadin

Am son avluppà

Un puchet, a dirv al ver.


Barba Nucent

Mo it farevin ben al dver,

Si t'fiesin qualch mal,

Chi si ch't'fa cmod fè Pasqual

De Vrgnana, ch'in manzò

Un dì tant ch'al crpò.

Mo al t'brontla qusì i budie,

Tuot da tavla, e fatt in drie,

T'n'fies qualch chias.


Sabadin

Ohimè al corp, ohimè cha pas,

Cha l'ho dur chm'è un giaron,

Und siv, Barba Ton?

Tulì un poc un matarel

E sfrgam un poc la pel,

Dschiapam un po' 'l brag,

Fà ben prest, ohimè cha vag

Vien qui un poc, Iacmin.


Iacmin

A tal diss pur, Sabadin,

Ch't'andass un poch più destr,

Vienz, aida un poc, Silvestr,

A slargar st'puvret.


Sabadin

Alintam, cha son tropp strett,

E purtamin t'la stalla.


Barba Plin

Tulil su, prché al tramballa,

Es n's'po tgnir in pia,

Tul su, Pol, e portal via,

Prché a sent ch'l'ha amulà

Una vessa, ch'm'ha ammurbà,

Purtal là d'dria al paiar,

Chal s'possa ben sburgar

Chal sta mal, st'puvraz.


Sabadin

Ohimè, donn, purtà un buraz,

E scaldamal da st'là,

Fad ben prest, cha son spazzà!

Mo ch'diran i tua vsin,

Cun ti è mort, Sabadin,

Ch'iera al spass d'tutt al chmun,

Oh, ch'faran sti ragazzun,

I sran mo piers tutt:

Mo dì un poc, ch'diran mo 'l putt,

Cun ti srà passà d'là?

Ch'ti er pur ti, ch'ognun al sa,

Al trastull d'tutt quant,

Cun i sun e cun i cant,

Dal to dolz chitarrin,

E d'sira e d'mattin

Ti er sempr d'un umor

Oh curpaz traditor,

A t'ho pur impì a to mod

In qusta botta, o sguazza e god,

Oh, gulazza maledetta,

Ohimè, al trem dal pè alla vetta,

An so sa tgnarò sald

A sent ben mi chal m'ven cald.

A brigada, mi min vo,

E mai più v'vedrò,

A m'arcmand, Barba Plin,

A Mingon, ed a Iacmin,

Anca vu, Barba Andriol,

Ed a tut quant sti fiol,

Prché a sent ch'mi m'in vo via,

Es v'preg i mie fradia,

Cha scrivà cun dal carbon

Tutta quanta la cagion

Dla mie mort, e dal mie mal,

E attaccà qula carta a un pal,

Lì vsin dond a srò,

Suplì, prché a m'in vo,

La qual appa a dir qusì:

Oh ti ch't'pas pr d'qui,

S'in ti regna dla pietà.

Butta i ucch da st'là

Che qui i zaz Sabadin,

Qual, pr haver manzà un cadin

Pien d'sughi, e fin a dies

Piez d'torta, ha qui dstes

Al vintron, cun al caldum”.

Osù, pur apia una lum,

Chal m's'amola al canel.


Barba Plin

Tuol in spalla Gabriel,

E val porta la d'cho,

Cha sent mi cha vien a cò

Pr d'sotta a tutt andar,

Portal là, dopp al paiar,

Su ben prst, pò lassal lì

In tagn mod l'è appressa a dì

E dman al n'harà mal,

Ch'm'al s'è sburgà al canal.

Sintì pur ch' rmor al fà,

Ch'al s'ssent fin dlà

Trar scurez da stallon,

Sent pur là, chal par al tron!

Osù, car i mia fradia,

Av ringrazi, andav cun dia,

San vlì star qui da nu,

E chmandaz ancora vu.

Am v'arcmand Mamlel,

A vlen far un saltarel

E ballar un puchtin,

Mo l'è causa Sabadin

D'tuta quanta sta ruina.

Mo a vui fari dmatina

Un rebuf a qual pultron,

Cha iho fatt purtar al son

Prché al v'dies un poc d'sulaz,

Mo al s'è empì trop al curpaz

E d'bevr e d'manzar,

Cha darà bel a crepar.

Mo sal creppa, al srà so dan,

Mi n'm'invui piar nsun affann,

Al dsè andar più destrament

Chal n'harev tal accident.


IL FINE