LA

SIMONA

DALLA SAMBUCA

la quale va cercando da filare in Bologna.


Dove si sentono le gagliardisie di cinquanta

filiere con i lor nomi e cognomi.

Donn miè a son vgnu

A star dman qui giù da vu

Cham dadi da filar,

Perché a cerc d'guadagnar.


A viegn su dal muntagn,

Chmod a psi vder a i pagn,

E al calz d'bisel,

Chim van a campanel,


Mie marì, disgrazià,

E andà vie con i suldà,

Quand l'ha udì tuccar tambur,

L'è ben ver cha n'm'incur.


Che s'ben a stieva a cà,

Al vleva cun se sa,

Ch' mi i fies el spes a lu,

E ugn dstè al m'tuccava su.


Basta al m'ha lassà suletta,

E dal pan a n'n'ho una fetta,

Es ho quattr pattuzzin,

Ch'staren sotta un curghin.


Mo s'ben anch a son mi sola,

A furnis la famiola,

Es fo l'spes a tus,

Cun la rocca e cun al fus.


Ch' fra tutt il filir

A son presta in tal mstir

E la nott a fil più mi

Che n'fa gli altr pr d'dì,


Barba Riz, mie compar,

Ha un gallett in tal pullar,

Quand a sent ch'al salta su

Nev pinsà cha dorma più,


Mo am arsent, dit e fat,

Es sbalz su in tun trat,

Es m'met al mie guarnel,

Al grimbial e al pansel.


Quando po am son afiubà,

A min vagh d'tirà

Vers al bus dal murel,

Es tui un sulfanel


E po' tir su al stupin

Dla lum, un puchtin,

Es al bagn e po' l'appiz,

E po' faz inanz i stiz.


Quand a io po apres al fuog,

Am arset po in tal mie luog,

Zuè lì in tal mie canton,

Cun la mia roccha a galon.


E lì prilla, storz e tira,

Tutt'al dì fin a la sira,

Imp, vuoda, cava e mett,

Fila, inaspa e fa gavett.


An manz ma' un bcon,

Donne mie, che m'sava bon,

Pr la gola d'lavurar,

A no temp d'manzar.


Quand a tui al fus in man,

A mett in gremb un pan,

Es tign bcunzà

Mentr a cui su gli aguchià.


A io po' quest pr us:

Chan dspic ma' al mie fus

S'al n'è gros d'piena man,

Ch'tutt 'l mi vsin al fan.


Av vuoi mo' dir d'più,

Chal s'trova su da nu

Da cinquanta muntanar

Ch'n'fan alter che filar.


E s'aà vlì cal diga tut,

Sì dal vecch com dal put,

Al dirò s'a stadi attent,

Chal io tutt in tla ment:


Prima al iè la zè Sabetta,

E la guerza dal Mzetta,

La gubbina d'Savor,

E la zoppa dla Fior,


La Zvanna d'Taccon,

La Flippa d'Vergon,

La Tugnina d'Burgot

La Salvestra d'Fagot,


La Minghina d'Sturnel,

La Battista d'Brunel,

La Zirona d'Galvan,

La Lurenza d'Suvran,


La Mattia d'Miclaz,

La Ptronia d' Buttaz,

La Muretta d'Ranocch,

E la Basina d'Battocch,


La Prina d'Stupin,

La Lcia d'Sabbadin,

La Nstasia d'Pajariz,

E la Plunia d'Sturiz,


La Dunina d'Marchet,

L'Algranda d'Schippet,

La Ghidina d'Stupai,

E la Minetta d'Burcai,


La Gnesia d'Sambug,

La Marchetta d'Pacchiugh,

La Muretta d'Stramaz,

E la Luschetta d'Spinaz,


La Viola d'Rundon,

La Dratia d'Galavron,

La Santina d'barba Meng,

E la Ghirarda d'Rameng,


La Lzadra d'Scappin,

La Biundina d'Lumin,

La Pandora d'Radicch,

E la Mingarda d'Cavicch,


La Tadia d'Quartirol,

La Zintil d'Gangajol,

La Barbosa d'Zangion,

E la Paulina d'Piston.


La Cattoza d'Buraz,

La Spranza d'Tinaz,

L'Urslina dal Gogol,

E la Mantina d'Sadol,


La Sandrella d'Scartoz,

La Zuffetta d'Barboz,

La Tunella d'Zambajon,

E la Niclosa d'Zedron.


La Magrina d'Sandrin,

La Castora d'Cavrin,

E la Rucchia e la Ruffina,

La Rinalda e l'Agustina,


Questi tutt che v'ho contà,

San tgnir ben la roccha a là,

Mo' a in prè dir fin altr cent,

Ch'in filar son eccellent,


Mo pr dir la conclusion,

Mi n'atrov parangon,

E se gl'ho tutt superà,

A far sieg a gli agucchià.


Pr filar ugual e tond,

A n'ho par in tutt al mond,

O vlì far tella d'lin,

Tella doppia, o flindintin.


Es pr sort a vlì vder

La mi ovra l'è al dver

Ch'av mostra s'la v'pias,

Mo ni dad po dal nas.


Guarda qui st' gavtin,

E po' st'alter gmisselin,

Quast'è stoppa, quest'è garzol,

Ch'in dsiv, l' mie fiol?


Par mo a vu chal sippa bel

Mo vd' st'altr gmisel,

Ch'è d'tuoz, ch'vin par?

N'farevni di cular?


Quand a do in t'una ruccà

D'garzol ben lavurà,

A fo un fil chav so dir mi,

Chla seda n'n'è qusì.


Mo s'l'è po cunz mal,

Malament al faz ugual,

Cha savì ch'quel stropp

Dan impaz un poch tropp.


Pur a io la ptnella,

E la russla mia surella,

Tutt al dì sta a ptuar,

E mi attend sempr a filar.


A su donca, n'manca

S'a vlì esser ben trattà,

Darm un po' da lavurar,

Cham possa sustintar.


Dam donca, sa vlì,

Lin o stoppa o quel c'havì,

Ch' pr cont dal pagament,

Al ni srà da dir nient.


A turò robba e quattrin,

Tridel, remel, pan e vin,

Camisol, calz e strazzua

Chi sran bun pr quij fiua.


E prché al vol la rason,

Ch'a sappa quella cha son,

Am chiam la Simona,

E mi madr la Barbona.


O su, a vuoi andar in su,

Chan poss star qui più ,

Ch'i patuoz stan asptar,

Ch'ai dega da biassar.


Donn mie, am arcmand,

Vgnì d'l' bot in l'nostr band,

Ch'av darèn, s'a vgnì da nu,

D'l' cuchl e di marun.


IL FINE