UTROM

DEL DOTTORE

GRATIANO,

Partesana da Francolino. Con

le Quattro stagioni, & altro.

UTROM DEL DOTTOR GRATIANO


So ch'a dirì: “Dond iet mo stà, Dutor,

Tut sti dì, senza vgnir in zà?

E po ti dì ch' t' c' port amor!

A la fè, ch' a st' mod al n' s' fa”.

A ve respond ch' mi so al dulor

Cha prov quand a sto via d'sta cha,

Mo al tardar dal vgnir al val dirò:

Utrom, sa iho rason, o sì o no.


Quand a son qualch volta qui da vu,

E cun qui occhi am guardad a mi,

Quanta gratia è in tal mond è tutta in vu,

Tal ch' am perd a cunsidrar in mi.

E po pinsand a quella cha si vu,

A rest tut stupefat da pr mi,

A dir ch' Amor m'habbia pres e ligà,

Utrom, hoia a murir da dsprà.


So ch'a dirì cha son vulà trop alt,

Quest mi al so, mo ch' sa mo da far,

Sa vo cunsiderand l' bel part

Ch' regnan in vu da far innamurar,

No mi ch' son un verm, ma ancora Mart

N' prev za ma resistr a cuntrastar.

Mi son la causa, e vu si l'effet,

Utrom, hoia da perder l'intelet.


A so ben cha ridr' d' sta nuvella,

Es dirì “Va' via, tira in mal' hora”,

Mo quand a pinsarì cha si sì bella,

Vu m'darì rason, cara sgnora,

Cun qula gratia, e qula dota loquella,

Sforza la zent ognhor ch' s'innamora,

E fa sfurzadi agn'hom a inamurar,

Utrom, d' st' mie cor ch'sa da far?


Quand la natura ve fe vgnir al mond

Dal cert la mustrò tut al so valor,

L'andò ben a piscar fin in tal fond

Pr dar gran maravegia a gran stupor:

Ogn virtù in vu sola s'infond,

E al sol, la luna e la madr d'Amor

Vign e partecipon l'stel fis e erant,

Utrom, s'a i ho d'lhom o d' l' elefant.


Se in vu sol e la gratia e la legiadria

D'quant donn s'artrova a qust' età

L'è ben hunest, ch' cun la curtsia

Sia accumpagnà qusi stupenda beltà,

E senza quella, nient a n' valria

E la natura in tut arev manchà,

Ma la v'ha fabrichà piena d'amor,

Utrom, ha da murir pr vu un dutur.


Vu dirì: “Mo l'è vech e l'è puvraz”.

Mo Amor è senza lez, ch'al se sa

E po s'innamora anch più brut mustaz

Ch' n' n' è al mie, andand in zà e in là

S'a fus mi sol arev dal balurdaz;

Cha i n'è tant ch' bramin questa chà;

Ma i savi s'an a tratgnir e simular,

Utrom, hoia a furnir o chmnzar?


Giove s'innamurè d'la so cusina,

Nettun in Tetti, ch' fuors anch suspira,

S'innamurò Pluton d' Proserpina,

E Ercul s'innamurò d' Dianira,

Mart per Vener fe' tanta ruina

Quand ch'Adon i la tols una sira,

E sal s'innamurò tut qustor,

Utrom, al s' po inamurar anch un Dutor.


E s'a vles narrar tutta la zent

Ch' pr' Amor an fat d' l' cos grand,

Al ijn sarìa da dir fin al set cent,

S' ben a vgnes d'hora in hora parland,

Mo a vui trattar d'quij chin al prsent

Ch' fan materij più ch' n' fe' Urland,

Es n' s' incurin, s'ben tut al san,

Utrom, che cosa de' far un Gratian?


A vuler ben l'è pur la mala cosa,

Mo l'è ben anch piez havern passion,

Perché a iho liet in Paris e in Tolosa,

I gran travai d'Amor, e l'custion.

Al muderars è ben cosa gratiosa,

E mustrar al cattlu, e aver dal bon,

E saver addular a temp e luog,

Utrom, sal ve par bon cumpir al zuog.

LE QUATTRO STAGIONI


PRIMAVERA

Quand s'lieva l'alba mattutina

Sol pr tor a Titon l'amata Aurora,

E quand al sol rsplend a la matina,

D'un fresch vintsel par ch' marmora,

Quand ogn usel al so cantar raffina,

Cun l'erba i fiur la terra s'innamora,

A qusì la prima volta ch'av guardà

Primavera per mi n'fu za' ma'.


ESTATE

D' più, quand l'antiga madre terra

Dona al criatur al so tsor,

E cal sol fulminand fa gran guerra

Al fadigos villan pien d'sudor,

E ch' d' Bach al bon liquor s'afferra

Ch'alliegr fa passar ogn dulor,

A qusì anca mi m'par d'esser arstà,

Un sol oscur, in la più calda està.


AUTUNNO

Passand più oltr al temp e la stason,

Ch'ogn' albar senza fuoia nud resta

E i pra tut insem a cunfusion

Senz'erba e senza fiur tien la furesta,

La terra, con dulor e passion

Senza frut negun con vlen ch' resta?

Così mi son autun pr vu in dulor,

Senza frut sperar, frond né fior.


INVERNO

E po', mostrand sempr ma più ruina,

Passand inanz senz altr intrval,

Quand l'aiar fuma, e ch' tut fa brina,

E l'acqua è dvintà chm' al cristal,

La terra d'agn banda par farina,

Né fa più bon andar a piè e caval,

Qusì un invern senza vu m'caza,

Tra l'acqua, brina, nev, e fred e giaza.

SONETTI TRAMUTATI


Rotta è l'alta colonna.


Rotta è dal Studi la più gran duttrina

Ch'illustrava al paies d'Franculin,

Qual iera al stipulant Michlin,

Fiol d'mi Duttor Gratian e d'Sabadin.


Morte m'ha fat troppa gran ruina

A strinzr la grandezza dal cunfin,

Vegnand ti grand, a son restà pznin,

Ch' sempr al fin dira sira e matina.


A chmod ma' psu far la mala sort

A stag in dubi, quas dal sì al no,

E spes volt pianzand a chiam la mort.


Ch' pinsand un tal cas in sina a mo

D'un sì garbat fantin, ch' mors a tort,

Quant in sia sta d'zà o d'là da Po.


Pr tant a val dirò

Al mia gran dan, sa m' starì ascultar,

Quel che mai più possibil d'acquistar.


Mai più in vui alivar,

Da po c'ho pers un sì gentil fiol,

Ch' purtava l'scarp da do sol,


Diga pur ch' dir vuol,

C'havea un tusot ch'iera tut lezadr,

Pien d'garbatura simil a so padr.


Hor che 'l ciel e la terra


Ades cal tas al ciel cun ie element,

E ogn animal durmend par ch' rposa,

La not cun al silenzi è tenebrosa

E fin al mar sta cit, chal n' s' sent


S'a brus, s'a pianz, s'a rid e s'am lament

Sempr cercand d' dir qualch cosa

Ch' mai fu dita, né in rima né improsa,

Ma parland a iho pur qualch cuntent.


Mi sol andand a una fresca funtana,

Pr trar d' l'acqua e cavarm la sed

Buand cun una man non trop sana.


Né vuoi ch'al mia sofrir sia senza sed,

S'amor mille volt alla lontana

Pr esser lunz da quel ch' n' s' ved.


E quij ch' n' m' cred,

Possan pruvar, più c'ha n'ho fat mi,

Quant è scura la not, e chiar al dì.


E pr furnirla qui,

A dirò a st' mod, sa m'starì ascultar:

C'ha vuoia d'murir, possa crepar.


Ma perché a i ho da far,

Restavn tut quant in union,

Ch' mi v' las cun la pas d'Marcon.


Il FINE









Testo trascritto da: Utrom, del dottore Gratiano Pasrtesana da Francolino. Con le Quattro stagioni, & altro. Di Giulio Cesare Croce., In Bologna, presso l'Erede del Coci, al Pozzo Rosso, Con licenza de Superiori., BUB